早幾日出席舊同學團拜時講到情人節，咁啱席中只有一位姊妹係單身，好自然佢就成為眾人「關心對象」。「有冇人追呀？幾時拍拖呀？」經過一輪炒鬧後，有人索性勸佢主動出擊，去美麗華酒店（071）搞嗰個party，貪佢女士免費入場，去咗又唔會蝕。
世界上有三種人係唔需要慶祝情人節，一種係唔想慶祝情人節嘅情侶；第二係男女是但一方當日唔得閒嘅人；另一種就係單身人士。當全世界都瞄準堅持慶祝嗰班人個市場時，想突圍、出位又邊有咁易？反而如果成功吸到一班當日原本唔諗住消費嘅人，乖乖交出佢哋嘅銀包，就算係成功開拓一個藍海。
點睇都行唔到「浪漫」路線嘅翠華（1314），聽日會推108元情人節套餐。大家可能質疑，要慶祝都唔會去翠華啦。不過如果一對老夫老妻諗住當晚去翠華求其食個飯，咁啱見到呢個餐，佢哋可能又會即慶應下節叫嚟食。所以相信翠華今次只係想吸第一類人。
至於美麗華今次就叻啦，選擇搞single party，菲菲認為肯定可以一次過吸納到第二同第三類人。團拜當晚有人就話當晚男友唔得閒，與其自己過，不如去呢啲party「見識」下世界。
所以話，多得商界嘅創意，乜人都可以過情人節，唔一定要留喺屋企，酸溜溜的唱「其實自己一個更開心」。
Fifi
本欄逢周二、四刊出