台灣富商郭台銘計劃發展機械人？《華爾街日報》引述消息人士報道，郭台銘旗下富士康正與Google商討合作發展機械人項目。
報道指，富士康舊年開始跟Google作業系統Android嘅前高層Andy Rubin傾合作，為推進項目發展，郭台銘最近曾經喺台北跟Rubin見面，Rubin積極向對方講解新技術，郭台銘亦好感興趣咁話。
唔講唔知，Google舊年成立咗一個專門研發機械人嘅集團，又收購咗八間相關企業，包括Boston Dynamics，呢間工程公司曾經為美國國防部總部五角大廈設計移動機械人。
咁啱得咁橋，郭台銘近年成日話要建立一間有好多機械人嘅工廠，希望集團轉型做醫療設備之類嘅高科技、高毛利、資本密集嘅產品，難怪雙方情投意合。