港大今年有142個資深員工獲頒發長期服務獎，3月底就退任嘅港大校長徐立之，噚日負責喺典禮上頒獎，多謝佢哋多年嚟忠心為大學服務。據聞得獎人係焦點之外，徐立之亦被來賓爭相集郵合照，趁住徐立之離任前影相留念。換肝權威、香港大學外科學系系主任盧寵茂出席典禮，為佢部門攞獎嘅員工打氣之餘，亦攞出手機，即場同徐立之玩自拍，相中兩男子都好含蓄咁笑，唔通唔慣呢啲少女指定活動？今次獲港大頒發長期服務獎嘅員工嚟自53個部門，其中12個獲頒發40年長期服務獎，21個獲35年長期服務獎，獲頒發25年同15年服務獎嘅則分別有55及54人。