熱錢趁日股休市來港炒番轉，恒指挾上二萬二，殺埋堆熊仔。如無意外，呢轉反彈應近尾聲，皆因資金以殘股為目標，內銀、保險、內房近月跌到天殘地缺，昨突然變身「三箭頭」，明顯是挾淡倉。以黃金比率0.382倍為目標，恒指最高可見22310點，意味仲有300點水位，但去到水尾，博大霧值博率亦不高。
舊經濟股份回勇，新經濟自然受壓，IGG（8002）、嘉里物流（636）無晒生氣，大升市輸錢並不意外。不過，炒股要顧及全局，手持強勢股，賺錢機會始終較大，不必因兩三日疲態就急於換馬，想日日賺錢，只會令自己疲於奔命，自亂陣腳。
電力設備股表現強橫，博耳電力（1685）昨率先破頂，下隻應輪到賽晶電力（580）！先睇幅圖，10日、20日及50日線匯聚一點於0.89元，代表橫行收集完成，股價昨即時開車，尾市爆上10%，收齊頭1蚊，創一年收市新高，成交狂升，MACD見番雙牛，9 RSI只係74，應是連棍爆上格局！目標：1.35元，水位35%。
彭博綜合預測，賽晶去年可賺5,400萬元人仔，折合6,800萬港元，較2012年的44萬元人仔飆升數十倍，確認業務谷底反彈；今年純利料增78%至9,600萬元人仔，現價預測PE僅11倍，平得過份，去番15倍，剛好1.35元。
魏力
http://www.facebook.com/2012jason