近年多咗好多中小型新股，冧巴同名字都好難令人記得起，正在招股嘅中國金屬資源利用（中金資源，1636），名字竟然跟2009年上市、舊年被證監會申請清盤嘅中國金屬再生資源（中金再生，773）有九成似，仲要業務性質類近，好能令人有好印象喎。
翻查資料，名字有「中國金屬資源」六個字嘅公司，前景一般。撇除被清盤嘅中金再生，創業板仲有一間中國金屬資源，不過呢間公司轉型幾次，原先從事電腦硬件買賣同B2B網站生意，後來收購雲南礦場轉做採礦，但發展唔理想，又走去收購彩票軟體開發商，2011年開始易名為中彩網通（8071）。
天曉得中金資源會否同一宿命，但主席俞建秋噚日就話冇有怕，集團絕不改名，而且真金不怕火煉，佢反而樂觀認為，可能因為咁得到更多關注都唔定！