微軟創辦人蓋茨除咗研究科技之外，原來仲鍾意研究避孕套。佢喺社交網站Reddit嘅「ask me anything」環節，回應大眾提問時，話男人唔用避孕套係因為個設計唔好，所以佢研究緊用納米碳管技術做避孕套，等個套薄啲，男士們就自然肯用，想造福人群咁話。
蓋茨過去幾年都專注慈善事業，舊年11月佢旗下慈善團體公佈，會研發新一代避孕套，可以保留、甚至增加愉悅感，包裝同設計都會更加易用，希望更多人用避孕套，預防愛滋病傳染。有網友就問蓋茨，有冇機會攞「最佳避孕套獎」？蓋茨話𠵱家仲未有結果，不過會用納米碳管技術製造減低個套嘅厚度。
另外，比較估佢唔到嘅係，佢原來好鍾意洗碗，自爆晚晚都會洗碗，就算有人願意幫手，佢都唔要，覺得自己嗰套洗碗方式先係最好。