國務院總理李克強考察比亞迪（1211）車廠時，聲言「要向污染宣戰」，旗下班馬仔即刻做嘢，就算新能源汽車補貼2015年底先到期，已急不及待為補貼續期，概念股即時起動，就算唔喺補貼範圍的Tesla都炒得起，直逼200美元，創出歷史新高，證明炒概念都係一條出路，所以Samantha向大家建議一隻電動車概念股耐世特（1316）。
耐世特早前與寶馬i3電動車簽署一份OEM協議，為期12年，寶馬區域總裁形容i3是「電動車的終極駕駛機器」，由於車身輕巧和售價較Tesla Model S便宜，在私家車市場相信有一定市場，若能夠打響名堂，其他品牌電動車的定單將會陸續有來。
當然，耐世特賣點豈只電動車，按收益計，他們是全球第五大轉向供應商，集團有逾八成銷售額是來自歐美地區，隨此兩個地區穩步復蘇將利好該股表現，加上最大客仔通用去年終於扭轉弱勢，有傳仲會錄得自2008年金融海嘯以來首次派息，為業務打下強心針。
耐世特自上市以來股價都一直上揚，根據招股文件，耐世特去年預測盈利不少於8.2億元，較去年同期增長超過八成，這意味集團盈喜在望。該股上月創出4.97元的歷史新高後回落，昨日成交再現活躍，相信衝破5蚊大關指日可待。
Samantha
本欄逢周一、三、五刊出