由於曼聯已經喺英足盃出局，所以佢哋趁今個周末冇比賽，拉隊去杜拜集訓5日，但35歲嘅英格蘭中堅里奧費迪南（圖）就冇份去，要留喺英國。曼聯會喺禮拜四發聲明解釋點解里奧冇份去集訓，據指佢會宣佈喺今夏約滿後離隊兼掛靴，紅魔唔想喺佢身上浪費資源。查實里奧喺今季英超只係踢咗7場正選，連禮拜三作客阿仙奴場大戰都冇預佢。