上星期恒指做番支周線陽燭，係好兆頭，通常喺短線急跌市之後出現嘅周線陽燭，反映股市跌勢喘定，往績顯示起碼有番一至兩星期好景，晉佳估計，短線港股氣氛唔會太差。
有消息話人行以窗口指導形式，收緊上月四大行新增貸款，正正幫到上個月水緊情況解畫，令人覺得情況原來並非想像中咁嚴重，同埋《華爾街日報》傳人行想監管互聯網金融，即時反應係內銀股轉強、科網股轉弱。
受惠煤炭價格低迷
事實上，內銀股係老弱殘兵，反彈極有個譜，科網股就係強過龍，估值明顯超過合理值，亦有顯著下跌風險。你係基金咁重倉，就被逼周旋喺呢啲強勢明星股同重磅股之間，但作為散戶，其實唔一定要介入呢啲戰場。尤其股市調整過後，睇圖逢高追細價股情況亦有所收斂，機會並非時時有，反而從基本因素出發，揀中新嘅強勢板塊，未來一年會有逢低吸、然後賺錢嘅機會。要選一個新強勢板塊，晉佳會揀水泥股。
雖然內地樓市開始冷卻，加上城鎮化十劃未有一撇，但近期水泥股收入增長尚算穩定，華南、華東、華中市場情況唔差，而且煤炭價格低迷，有利高耗能嘅水泥企業擴大利潤率，盈利有上升空間。剩係睇建築股中國建築（3311）生意好到不得了，工程定單可以做足三年，晉佳直覺覺得水泥行業都唔會太差。
如果數經營華南、華東、華中地區，大隻包括安徽海螺（914）、中國建材（3323）、華潤水泥（1313），細隻如亞洲水泥（743）、台泥國際（1136）。不過，中建材債太重，剩係畀利息都畀到嘔，已拖累到盈利。台泥國際就被母公司全購，每股作價3.9元，未知會唔會私有化，剩番華潤水泥同亞洲水泥係唔錯選擇。
華潤水泥先睇7元
主攻華南嘅台泥國際市賬率0.83倍，即係呢個估值對管理層嚟講，係相當平，所以先會考慮私有化。而最可以比較嘅亞洲水泥，主要攻華中地區，市賬率0.8倍，估值相若，前景照計唔會同台泥國際差得遠，長線亦買得過。
論盈利，舊年全年將升超過100%，市盈率高極都只係8.7倍，股價目前係兩年高位左右，強得有道理，可分段吸納，兩三年升一倍以上唔難。
至於華潤水泥，同台泥國際嘅版圖更接近，規模大啲，自然估值高啲，市賬率1.8倍，如果以市盈率計，都係抵買，事關歷史市盈率16.2倍，但上月已經發咗盈喜，盈利起碼升五成，市盈率跌到去11倍左右。
喺收入、利潤率有望持續上升之下，未來盈利可以keep住有唔錯表現，目前低雙位數字PE計，長線絕對係平，只要市場冇大危機，上半年首站可以睇7元，長線唔估頂。
晉佳
本欄逢周三刊登