嶺大梁粉新校長鄭國漢，原來16歲開始食夜粥。佢噚日喺嶺大春茗上即席示範「楊家太極」，耍起嚟有板有眼。校方本來安排五個協理副校長同鄭國漢一齊耍，但其中一個副校長夏迪星（Herdip Singh）早前訓練時唔小心跣親，仲未好番，所以得返陳清僑、施雅德、樂美德同李雄溪教授落場獻技。
鄭國漢噚日自爆1962年、即係佢9歲時跟住媽媽同妹妹，由潮州合法出境去澳門，之後偷渡嚟香港同阿爸團聚。當年上咗香港仔岸邊卻搭錯車，同阿媽阿妹失散；齋識潮州話嘅佢好在識寫爸爸姓名同住址，人蛇大哥先送到佢返屋企！到16歲，佢受到拔萃男書院地理老師啟發學功夫，之後跟人入咗精武體育會學洪拳，之後仲學埋螳螂拳同楊家太極，難怪家陣61歲仲好fit，佢話練太極可以訓練集中力同平衡力！