股神畢菲特嘅投資眼光及功力，相信冇人會質疑，旗下投資旗艦巴郡股價亦非常驚人，以周一收市價16.9萬美元計，入場費（1股）高達132萬港紙，絕非普通散戶嘅玩意。但唔使灰心，事關本港上市企業中，有一隻銳意打造成中國巴郡，你同我都可以參與，講緊嘅就係復星國際（656）。
有上海和黃（013）之稱嘅復星，近年成功升呢做咗中國巴郡，事緣復星強攻保險業務，取得銀彈再投資，經營模式照抄巴郡，最新落實逾百億銀收購葡萄牙保險商。復星瓣數多，除炙手可熱嘅醫藥及物流外，還包括保險、內房、鋼鐵、零售等，集新舊經濟於一身，炒乜概念都直接受惠。以上海為基地的復星，講明睇實自貿區商機，隨時主動出擊；另外，集團去年宣佈入股阿里巴巴旗下菜鳥，馬雲揚言會透過菜鳥喺全國打造3,000億銀物流網，持有一成權益嘅復星，連阿里巴巴概念都食埋，盡顯其超卓投資眼光！
講完一大輪，大家可能會問，收購後有冇成果先？成果，五個字︰業績與股價。講業績，復星上月發盈喜，受惠各產業利潤穩定增長，以及保險業務發展迅速，去年度盈利將顯著增長，現價市盈率僅12倍，平得可憐。講股價，噚日大成交炒高半成，收市創逾六年新高，橫睇豎睇，都值得落注支持。
唐牛