是咁的，嗰日喺港鐵青衣站出閘，有個大陸自由行拎住張智能車票，想喺八達通閘口出閘，咁就梗係入錯窿埋錯站唔得啦。
個大陸遊客好心急咁周圍望，我本來應該即刻譴責佢「做乜阻住個閘口又唔出閘啲大陸人真係好鬼麻煩！」咁先顯得我香港人同蝗蟲劃清界線敵我分明，但我一時鬆懈無咁做到，仲好主動咁用普通話……對唔住，係蝗語，嚟同佢溝通；最慘係我竟然精通普通話呢種胡語，愧對香港人身份。
我見過FB有人留言，話如果有蝗客用蝗語問路應該用廣東話對付佢等佢知難而退，亦有人曾經讚揚只肯用廣東話對答嘅醫護人員係香港人嘅驕傲，我竟然無遵守呢個規矩，我唔啱。
個遊客好開心咁問我點解出唔到閘，我竟然好客氣咁解釋佢知，智能車票要喺藍色閘口先出到，見佢唔識路仲主動帶佢去搵藍色閘㖭。
我錯啦，我嗰刻忘記咗佢地搶我地奶粉尿片金莎朱古力呢啲血海深仇，我應該任由佢喺港鐵站蕩失路，我應該大大聲同佢講：「唔識坐香港嘅地鐵就同我躝返大陸！呢度我主場！」
我竟然無咁做到！個大陸人仲笑笑口同我講：「第一次來香港，不知道這些規矩，真不好意思。」
我竟然答：「沒事，這種智能車票是新推出的，我也不太熟悉。」
我竟然被佢嘅斯文禮貌蒙蔽咗，我應該即刻諗起嗰啲喺港鐵車廂食嘢叫囂放低黃金幾兩嘅大陸人，佢地明明係一丘之貉，呢條友分分鐘係落嚟洗黑錢，我真係唔應該幫佢。
最後我仲教佢去便利店手機充值，我真係錯啦，佢見到香港人咁友善，肯定會再嚟，話唔定仲成家人嚟，愈嚟愈多大陸人，我地香港人仲邊有碇企！
原諒我，出賣咗香港人利益啊！