呂良偉、楊小娟兩公婆噚晚喺尖沙嘴搞敬老新春團拜飯局，佢哋13歲囝囝表演功夫，咪睇佢肥嘟嘟，耍起功夫上嚟好靈活，好有潛質入娛樂圈，阿呂話：「由佢自己創造人生。」
關之琳同甄子丹夫婦都去撐場，之之同台灣富商男友陳泰銘拍拖，兩人剛去完東京旅行，佢話：「新年去咗東京玩，仲有班朋友一齊去，冇滑雪，主力食，肥咗返嚟，要開始減肥。」
呻男友冇驚喜
情人節就到，之之話：「喺屋企過，唔想出街同人逼，會請個大廚返屋企煮。」仲話會請埋班朋友一齊玩，唔過二人世界？佢話：「成日兩個人食飯，情人節都冇乜特別。」問佢想唔想男友畀意外驚喜，例如求婚？佢就話：「日日都咁開心，一齊就得喇！」佢仲好肯定話男友唔會有驚喜畀佢。
撰文：馮仁昭