左丁山對桂林街夜市呢類平民飲食攤檔的前景，並不睇好，一啲人開口埋口講平民文化，搞活平民墟市，其實係不顧現實，不知道香港人的兩面性，即是NIMBYism（不在我的後園主義）。不久之前的旺角行人區，樂隊表演區，就是如此被撤掉嘅啫，好呀，「我鍾意去旺角行街趁熱鬧，但千祈唔好將我樓下搞成咁」，唔住喺旺角，唔知道行人區之喧鬧讓人瘋癲（旺角居民、次文化堂主人彭志銘就曾如此說：嘈到佢寫稿都寫唔到），現在嘅桂林街夜市，據食家劉健威在佢嘅專欄講，氣氛熱烈，人迫人，擠擁骯髒，食客興致高，唔得閒理。如此情況，引來報紙一片讚好。
其實幾個月前，就有報紙大罵食環署有法不依，唔掃蕩沙田花園城（與麗豪酒店距離約一百公尺）嘅食肆在入夜後將座椅擺放到街頭，搞到成行成市，行人道不利行人，對居民滋擾不堪，與桂林街夜市相比，花園城只係小規模啫，遲一啲，難保冇桂林街居民投訴桂林街夜市，就好似旺角區議會反對行人道一樣。
依家係21世紀，畢竟不同桂林街新亞書院時代。60年前香港人口少、收入低、冇電視，夜間娛樂缺乏，故此市民夜晚湧去大笪地、廟街滿足口腹之慾及歌唱娛樂。旺角花園街、通菜街、西洋菜街近山東街一段還試過擺年宵花檔，在洗衣街頭可以踢波㖭，當時即使各區街頭各領風騷，都唔會滋擾到居民生活，更何況當年邊度有人會打電話去乜署物署投訴㗎，我地屋企根本冇電話嘅。點解去到1972年，港英政府就開始維持街頭秩序，停發小販牌照呢？不外乎香港人口已多，街邊不宜有太多攤檔咁解啫，現在已是2014，本地人口遠超1972，即使係空想派議員都唔敢建議在花園街搞年宵市場嚟吸引人流啦。溫室派議員梁家傑話政府毋須一味掃蕩扼殺，只要「食物是否清潔，防火是否做足，小販開檔後道路是否暢通，對附近居民有何影響等，都需要政府評估協調。」評估呀？一評估就肥佬晒啦，食物清潔、防火、阻塞行人通道等等那裏會及格呀？及格嘅話，就變成天秀墟咯，梁議員！