梁振英回應政黨提出陸路入境稅建議，佢反對之餘，仲指香港人每日入內地數目比內地來港旅客多，又訓斥香港人唔應該未富先驕，忽然變身黨報代言人。一年前呢位人兄唔係帶頭歧視內地人咩？港人港地大大聲宣傳，將停零雙非當做功勞掛口邊，立法禁奶粉出境，當時好勇武，連王光亞都唔放眼內，賺番唔少民望，袋咗落袋，使埋㖭。而家就訓斥香港人未富先驕，變臉之快，盡顯smart ass政客本色。
怕得罪內地 寧火上加油
本來政府應該用各種方法消減香港人對內地人湧港產生嘅怨氣，但偏偏大家為咗政治正確，怕得罪內地官員，就一齊火上加油。人口政策係第一個機會與民共議，但林鄭擺出一副高傲姿態，一句「人口增長冇上限」，為中港矛盾升溫加柴加炭，砰一聲關上官民對話大門。第二個機會係單程證政策檢討，黎棟國又係一句唔需要，明明家庭團聚配額用唔晒，為怕得罪內地，又係問都唔敢問。到第三個機會，卡片蘇檢討旅遊業承受力，XYZ，佢竟然當自由行逼爆冇件事，寸嘴表示「大家等多班車！」
好明顯成個政府根本就無視市民不滿，當正呢種情緒係「病態本土主義」、「扭曲」、「歧視」、「冇信心」、「未富先驕」。可以預言由梁振英、林鄭，到蘇錦樑呢種政治無知兼傲慢，只會令反蝗運動得到更大群眾支持，最終造成本地人與內地人街頭衝突。
至今政府未有提出令人信服之論據，論證港深同城化、珠三角一小時生活圈帶來各方面影響，數據評估，benchmark及milestone何在。梁政府管治水平之低，是用口號及權術作手段，滿口「包容」、「未富先驕」一類扣帽子口號，而非實證將全個picture向市民逐一交代清楚。梁以八百萬人與十二億人作比較，指香港人每日回內地數目多於內地人來港，叫香港人唔好咁多聲氣，根本就係詭辯，香港一個城市，同一個國家比，黐線！
北京市、上海市嚴控外來人口，北京市已提出政策將人口外遷至河北省，廣州佛山同城化一樣要論證，惟獨香港政府竟然將如此重大政策停留在口號、情緒層面，而且仲由梁振英帶頭示範，香港唔仆都難！但另一邊廂成班梁粉就力推大嶼山開發，為實現同城化及一小時生活圈作部署，但sell畀香港人係用來解決住屋問題作賣點，你話，幾時香港行政主導體制，會淪落到維園阿伯及寶藥黨水平？
添馬男