【銅鑼灣百德新街】唔少人都話男女結咗婚，感覺就變得老夫老妻，不過喺羅嘉良同蘇岩，仲有陳奐仁同老婆身上似乎就唔多適用，前日兩對夫婦不約而同喺銅鑼灣拍拖行街，不知幾恩愛，同熱戀情侶冇乜分別，似係預祝後日難得嘅元宵兼情人節。
前日約兩點半羅嘉良喺百德新街一間餐廳醫肚，可能因為當時餐廳有唔少人，羅嘉良都戴住黑超食麵cool爆，相反舊年同嘉良生咗囡囡嘅蘇岩就除低黑超食包，不過其間都有食客認到羅嘉良眼望望。
大約食咗半個鐘，嘉良同蘇岩就離開，見記者影相就問係邊間報館，嘉良仲主動話要睇吓啲相，佢話：「影得靚唔靚㗎？攞住外賣出嚟會唔會唔靚？」其間兩公婆十指緊扣，真係好恩愛，跟住佢哋坐的士走。
陳奐仁攜妻買家品
接住傍晚喺日本家品店Francfranc見到陳奐仁同老婆，買到一袋二袋仲唔夠喉，之後再去實惠睇床同問做傢俬啲資料，其間同店員有傾有講互相講新年祝賀說話，表現親民，結果兩公婆行足成個鐘買咗啲家品走，唔知係咪為近日傳陳奐仁豪裝工廈單位成住宅添置家具？
採訪、攝影：梁繼光
