立法會議員都要秘撈？有本報男讀者噚日經過旺角弼街，發現疑似議員梁美芬嘅宣傳banner，賣嘅唔係滅鼠「政績」，而係另類「服務」！平時以專業人士自居嘅鼠王芬，頭上多咗個紅色波點蝴蝶結，令佢變身為可愛迪士尼角色米妮，隔籬配個colorful口號「鼠王BB，包你想試」，喺一眾桑拿沖涼同夜總會囡囡招牌中間非常突出，但男讀者話太重口味。
梁美芬同八方講，條banner唔係佢嘅，亦唔肯定係咪有人偷banner去改圖，佢話惡搞無問題，但今次呢個搞法就太猥瑣同庸俗，已經call咗警方跟進。八方喺網上追尋，發現鼠王原來唔係第一個被惡搞，蔣元秋同李慧琼早兩日亦獲賜「689雙飛」banner，掛正喺砵蘭街，像真度更高。