左丁山兒童少年時代，屋企冇電視，連收音機都冇，有時跟同學去涼茶舖飲涼茶，坐櫈仔睇粵語舊片，先知道有麗的呼聲呢回事。讀到中學，威啲咯，老竇在上海街買咗一部二手原子粒收音機，於是學人聽收音機，最鍾意聽葉觀楫講波，葉先生外號大聲葉，聲音沙啞，講波零舍肉緊，十分緊張刺激，後來有一位街坊去花墟場睇完波之後對左丁山講：「細路，場波悶到抽筋，我睇到瞓着咗。」左丁山話：「唔係噃，我聽大聲葉現場轉播，場波好似幾刺激吖。」街坊話：「講波佬你都信？」
大聲葉就係有此本事。當時講波嘅還有盧振喧，佢講得比較斯文，節奏稍慢，冇大聲葉咁好聽，但佢以「原子塵」筆名在「香港時報」足球版寫球評，與主編「穿山甲」嘅球評成為一時瑜亮，非常好睇，香港報業史上，憑精彩球評而可以促進報紙銷量，朝早八九點就令香港時報（國民黨報紙）絕跡報攤嘅，呢兩位算係創下紀錄，空前絕後。
英超車路士領隊摩連奴以設計防守戰術著稱，憑此擊敗班霸曼城一比零，但之前車仔對住弱隊韋斯咸，後者「泊架巴士」在禁區，全場密集防禦死守，悶和車仔零比零，摩連奴條氣唔順，嘲諷對方踢十九世紀足球，又話要帶副Black & Decker先至可以鑽穿對手「圍」牆。（Black & Decker係家具用品名牌）。一位大學歷史學家立即在BBC撰文，指摩連奴不懂歷史，在19世紀，所有英國球會都只識進攻，不重防守，前鋒線有六至七人，一味向前進攻，輸波罷就。咁又係，睇完教授鴻文，就知道摩連奴亂咁噏。摩連奴生於1963年，大概未見過五十年代至六十年代中嘅足球WM式，左丁山記得南華稱霸球壇之時，號稱有五條煙，就係前鋒有五人，右翼黃志強，右輔何祥友，中鋒李育德（球王李惠堂之子），左輔姚卓然，左翼莫振華，呢條五人前鋒無堅不摧，配以左閘右閘，左右中場及中堅，形成二三五陣式，叫做WM式。1968年巴西首創四二四式奪得世界盃，將WM嘅弱點暴露，之後演變成四三三及至今天注重防守之四四二，21世紀足球其實比19世紀更加保守。