曼聯今屆易帥之後表現差到你唔信，相信紅魔𧄌都好不是味兒，不過，曼聯終於有一樣好嘢喇！因為據一間網上公司嘅調查顯示，女性紅魔𧄌原來係最佳女朋友！
今年情人節同埋元宵佳節係同埋一日，有情人嘅固然sweet，冇情人嘅就梗係希望喺嗰日成功向心儀情人表白啦！網上約會公司Lovoo就食住呢個勢，最近搞咗個最佳女朋友調查，向2,000名英國男士作問卷調查，結果原來曼聯嘅女球迷係最佳女朋友。不過，一眾曼聯粉絲嘅姊妹唔好笑住先，原來條件有好多㗎，除咗要係曼聯球迷之外，仲要身高5呎5吋，有棕色頭髮及咪咪有34C，而樣貌更加要係英國欖球手施普安尼嘅前女友兼英國內衣模特兒Kelly Brook（圖）、車路士後衞A高爾前妻兼歌手雪露，加埋英國倫奧7項全能金牌得主恩妮絲嘅混合體！
正當我睇到眼都凸埋，想鬧「想創你哋」嘅時候，個調查報告不忘加多句：不過，接受調查嘅男士都明白「理想歸理想，得不到也等於妄想」。總算佢哋知道乜嘢係幻想、乜嘢係事實啦！好過曼聯領隊莫耶斯到𠵱家都唔知自己想點啦。
文：吾中
以女性角度看球星新聞，唔用眉筆用原子筆寫低球壇百態！