人人都話蘋果公司影響力可能低過早幾年，不過每每蘋果有新動作，全世界就一窩蜂死跟。蘋果推「土豪金」電話，成功掀起「土豪金」熱；之前只係傳蘋果會推iWatch，三星就怕執輸整咗隻所謂「智能表」出嚟。名副其實，口裡說不，身體卻很誠實。股市就最現實，iPhone推指紋解鎖功能，當時就炒高世達（1282）。所以近期港、台狂炒「藍寶石」概念，你就知蘋果仍然領導潮流。
話說蘋果CEO Tim Cook之前已證實美國一間新廠會量產藍寶石玻璃元件；再加埋有傳台灣鴻海已製造出最少100部藍寶石玻璃iPhone試機。最新又有科技網站引述文件顯示，指蘋果已經同合作夥伴GT Advanced落單，大手買入製造藍寶石屏幕嘅熔爐和爐腔，又買咗可以處理藍寶石嘅鑽石切割工具。呢三單新聞，已足夠為股民搵炒作。A股多隻概念股炒起，天龍光電噚日更加漲停，台灣相關股亦炒到㷫烚烚。
藍寶石硬度僅次於鑽石，所以有效防止螢幕刮花或者裂開，唔少手錶已經係用呢種材料。以蘋果地位，呢個舉動相信已經觸動唔少對手嘅神經，成功將藍寶石帶入大眾化消費電子市場。至於港股似乎暫未見相關股，但相信好快會有公司食住個勢，話要開拓「藍寶石」市場，到時隻股分分鐘閃過鑽石。
Fifi
本欄逢周二、四刊出