上輪喺西甲主場金身被華倫西亞打破嘅巴塞隆拿，周日終於重拾霸者本色，作客4:1大勝西維爾。不過，佢哋開賽初段令球迷抹咗一把冷汗，15分鐘竟然先失守，俾西維爾後衞艾拔圖摩蘭奴先開紀錄，其後對方仲有一球射門中柱；巴塞去到34分鐘先至定番少少，由阿歷斯山齊士頭槌頂入將比數扳平，而完半場前，更由美斯（圖）妙射反超前。換邊後，巴塞終於醒晒，美斯喺56分鐘攻入佢個人今場嘅第2粒，加上法比加斯錦上添花，最終大比數反勝。贏波後，巴塞同皇家馬德里、馬德里體育會同得57分，係92/93球季以來，再次有3隊同得57分，但就以較佳得失球差暫居榜首，都算可喜可賀啦！