《明報》老細keeper馬拉傳媒人鍾天祥正式空降，先出任首席執行總編輯，張健波則暫時兼任總編輯，此乃過渡安排，減低員工反彈，由始至終，老闆冇任何讓過步，一切都不過係緩兵之計，劉進圖被定點清除，keeper順利進駐，按部就班執行老闆交託嘅政治任務。
要維護聲譽 注定失敗
《明報》已經被搞掂，原因好簡單，就係睇穿一班香港知識分子同學者有姿態，冇行動，根本冇人有決心同資方周旋，書讀得多過HIT碼頭工人，但行動能力就差天共地。開幾個天窗，寫一兩篇文表表態，係冇鬼用。正如當年老毛之所以玩殘全中國知識分子，三十年代延安整風先玩一鑊，五十年代用陽謀引蛇出動，跟手整鑊反右，再玩多一鑊，1966年文革再玩鑊甘。大家會問點解整咁多劑都唔醒？講到尾死在「國情」兩個字手上，讀書人對共產黨帶領民族復興偉大事業有期望，甘心被老毛此等權術家玩弄。至今仍有不少真心膠仍深信毛澤東晚年信四人幫先至犯錯，無視三十年代延安整風運動中，毛澤東敵視知識分子之本質。
真心膠問題是過份天真，《明報》事件中員工也好、知識分子也好，一再表示要維護《明報》聲譽，就已經注定會失敗。因為此乃國情論、顧全大局論之翻版，一切以大局為重，即係縛住自己隻手，剩低把口以及fb快閃式抗爭，老闆只要buy time，hold一hold，等公眾關注減低，先至按原本計劃執行，抗爭氣勢一弱，自然就可以將反對聲音消解。HIT碼頭工人就唔同，有集體工會，有行動，set談判deadline，作長期鬥爭準備，有計劃爭取公眾支持。當日《明報》員工真係要老闆撤回空降keeper決定，就只有第一個星期呢個時機，set deadline，用工業行動作後盾，同時籌組職工會。同樣專欄作家表態之外，也要有行動部署，支持工會，咁仲有得砌吓。
張曉卿聰明之處，是先搞掂咗劉進圖，佢反過來幫老細講說話，員工要抗爭，但冇咗個領軍人物。另一個關鍵人物張健波，全力協助落實空降計劃，為消解員工反對情緒，赤膊上陣做過渡緩衝角色。其功能猶如黑社會逼女學生賣淫，女學生哭哭啼啼，旁邊自有推波助瀾之姑爺仔。一份聲稱代表香港知識分子媒體，兩位有學識資深傳媒人，心甘情願作中間人，度橋協助實行馬拉空降行動，並作盲公竹帶「馬拉兵入關」，其食君之祿，擔君之憂情操，愛護《明報》、兼大局為重，實在令人感動。
中國知識分子，由延安整風開始，俾老毛玩弄於股掌之中，到今日知識分子媒體被成功整治，背後有一脈相成之DNA。
添馬男