下周日就係一年一度嘅渣打馬拉松，食物及衞生局局長高永文今年應渣打銀行邀請參加兩公里賽事。「高民望」事先張揚佢志在參與，全程只會一氣呵成咁慢跑，唔會同其他人鬥快，亦都唔會自拍阻住其他人。
佢對賽事好認真，雖然周六周日經常要出席好多活動，但都抽咗三個星期日朝早去九龍仔公園練跑，每次跑足2.2公里。
高民望話，其實今年係佢第四年參加渣馬兩公里賽事，之不過以前佢代表渣馬受惠機構之一嘅防癌會參賽。佢話跑兩公里冇問題，平時去米埔參加觀鳥比賽，都要行兩至三公里。八方笑佢慢跑會唔會阻住其他跑手，佢就話條路好闊，唔驚阻住人喎，仲晒恩愛話平時愛妻有時間，都會陪佢跑㖭。