公民黨黨魁梁家傑噚日趁新正頭同傳媒茶敍兼介紹吓第二梯隊。出年就係區議會選舉，傑哥話泛民分區上大致完成協調，公民黨喺40幾區插旗，而該黨「學徒」就有34個，但唔好以為有位就有得參選，皆因資源有限，傑哥話要表現好，經主席余若薇考勤先有望參戰㗎。
講到政改，𠵱家泛民都唔知係百花齊放定係路線分歧，學民仔倡五區公投，佔中三子之一嘅陳健民又擔心公投打亂佔中。傑哥話對於政改「團唔團結都好悲觀，不過唔團結就更悲觀」，公民黨今晚約見學民傾吓，佢個人就覺得議員辭職公投同佔中冇必然衝突，但學民要解釋公投乜嘢議題、點界定獲得市民認同；佔中就要交代第二次全民投票為乜而等，再合力「磨出一個佔中流程」令泛民一致擁抱，更要趁呢段時間游說市民支持。