浸大馬年馬不停蹄，為咗校園附近李惠利嗰塊地，下個月向城規會晒冷，以2萬多個意見表示唔同意喺李惠利用地建豪宅。噚日浸大就用馬仔、馬拉糕、馬豆糕同馬蹄糕同記者賀新年，又送咗浸大研發成果「浸大尚方」出產嘅「健脾化濕方」，畀記者去濕喎。
校長年年跑馬拉松
成日都講環保嘅浸大，再送記者一個白色熊仔環保袋，個樣都好醒目又實用。浸大又為記者準備兩本書，包括鼓勵全民運動同中醫，健康好緊要㗎！陳新滋都好健康，由2011年起，年年都跑馬拉松，佢話會跑10公里，但呢排好忙冇訓練。副校長陸大章透露，中國體操運動員程菲4月會去浸大教兩個禮拜，陳校長都可以操fit吓啦！