投資銀行界內出名係「風頭躉」嘅瑞銀全球資本市場部亞洲區總裁朱俊偉（Joseph Chee）傳遭停職。路透旗下雜誌《IFR》噚日報道，朱俊偉同另一名賓架Sharlyn Wu上周被要求停職，接受調查。事件可能同天合化工主席魏奇女兒魏嬌（Joyce）舊年底加盟瑞銀有關。
市場傳聞，天合化工有意今年在港上市集資78億元，魏嬌去瑞銀之前，就喺摩根大通返工，佢舊年離開摩通冇耐，摩通就唔再做天合嘅上市安排行，瑞銀就有份做呢單刁。《IFR》噚日嘅報道就話，瑞銀聘請魏嬌唔係違反任何規則，瑞銀只係調查成件事有冇跟足內部程序。
朱俊偉係投行界出名嘅「風頭躉」，以前瑞銀有份安排上市嘅新股，喺投資者推介會、記者會同上市儀式都見到佢，近年佢就選擇性現身。上月佢又接受傳媒專訪，估計新股市場今年繼續暢旺。