史上最牛的佔領郵輪風波，由郵輪上一位立法會議員做代言掌舵，替團友出頭追究，向旅社施壓，句句對白針對大企業，超正義化身，忽然為弱勢發聲，比CCTVB十年如一日的爛電視劇橋段更得師奶歡心。
可惜為了區區一千幾百元「利是」賠償，歷史性佔輪，就這樣草草收場，爛尾得這麼倉卒，認真大嘥。佔領郵輪，其實，慢慢來，參考佔領華爾街，可以在郵輪上試吓：
一，養雞。保證是豪華蜑家雞，好食好住，無感染危機。團友一人一藪認養，以後唔慌過年過節冇活雞食。
二，長住養老。旺角一間棺材房月租都要二千五，住豪華郵輪，鄰居是立法會議員兼民建聯副主席，萬一沉船，可以搵民建聯救駕，神效過輪候政府老人中心。
三，唔使養老虎，跟郵輪豪華漂流（唔算旅霸嘛），做富貴Pi，將經歷拍成賀歲電影，唔叫金雞，叫金Pi！影評唔賣賬的話，就罵他們是評霸！放屁！