足總盃16強今晚8點喺旺角場揭幕，由奪得預賽冠軍嘅丙組「2哥」駿其天旭，火拼啱啱捧走賀歲盃嘅公民。話就話係越級挑戰，但今場淨係睇「大俠」羅倫士同「野人」迪天奴鬥法都值回票價。識睇波嘅，一定睇呢啲！
Lawrence，對於一班後生仔嚟講，可能淨係識由詹瑞文喺《我要做Model》飾演嘅張鐵柱以前條仔；但對於一班資深球迷而言，前愉園前鋒羅倫士先係一代「羅大俠」，佢喺03年射爆南韓門將李雲在十指關，至今仍教球迷津津樂道。
羅倫士演中堅鬥野人
繼09年後，足總盃今年再有低組別球隊角逐，現時係深水埗一間男士服裝貿易公司CEO嘅羅倫士，有機會再喺旺角場獻技，佢賽前都話好期待︰「真係好開心，近期嘅訓練量，更係將我7年來冇做嘅，一次過做返晒。」操練時串演中堅嘅大俠，得悉有機會鬥迪天奴，39歲嘅佢爆笑話︰「呢個巨人對決真係幾過癮，大家年紀相若，但佢好似大隻啲，加上佢平時有操開，自己點都有啲輸蝕。」
不過，喺預賽決賽以3:2贏乙組葵青嘅天旭，人腳一啲都唔輸蝕。除咗大俠，仲有「香港碧咸」陳耀麟、「6碼殺手」梁智駒等多名前甲組腳；阿耀賽前話：「雖然之前未試過齊人練波同比賽，今仗亦有李英偉同陳家興缺陣，但球隊大部份球員已請定假比賽，大家有充份休息下，希望會收窄同公民嘅距離。」現任英冠伯明翰行政總監嘅阿駒仲講笑話︰「如果順利晉級，就唔返英國住。」
呢個足總盃係採淘汰制，90分鐘打和會加時30分鐘，再和就互射12碼。至於門票就分60蚊同埋20蚊長者及學生票。
晨曦流浪參加港職聯
另外，由於足總盃多咗幾場越級挑戰，晨曦同流浪早前入信足總，希望16強可以安排雙料娛樂，等佢哋可以慳啲皮費，晨曦仲話想轉踢日波，開燈費咪唔使畀囉，不過都俾足總拒絕咗，搞到佢哋好無奈。雖然係咁，兩隊都向足總表態會參加下屆港職聯，但仍對新聯賽抱有疑問，希望足總提交更多詳情，等佢哋可以進一步了解。
知多啲
原籍尼日利亞嘅羅倫士（左圖右），03年喺日本上演嘅東亞錦標賽中，首次為港足披甲，面對02年世盃殿軍嘅南韓一戰成名。當年只得29歲嘅佢喺禁區接應隊友長傳，力壓包括柳相鐵（左圖左）等4名後衞，再扭過門將李雲在建功；雖然港足最終輸1:3，但佢嘅表現就被球迷封為大俠。
