狼英臉書之驀然回首，你今日睇咗未？呢排潮興玩facebook look back，估唔到狼英都「被」玩埋一份，仲要由佢1954年出世開始回顧。要數佢嘅first moments，當然係1988年2月20日接受港台訪問時親口講過：「我根本不是搞政治嘅材料。」呢個大話一講就20幾年，最終咪做咗689小圈子特首，呢句說話仲為佢呃到520幾萬個like㖭。
與路姆西共桌 多人share
話明係大話特首，又點會篤爆自己講大話呢。其實呢個look back係網民精心惡搞，叫做「689臉書的驀然回首」，近日喺網上瘋傳。最多人like爆佢嘅posts唔係大話就係偽術語言，例如「我都話我無講過無僭建咯」、「僭建處理咗，個僭建就唔存在」。最多人share佢張相，就非與路姆西共桌莫屬，舊年人人丟路姆西嘅時候，狼英就喺特首辦網站上載張相，扮喺辦公室睇文件，枱面就放隻路姆西，聲稱送畀個女做聖誕禮物，假到冇朋友。
出席新春酒會 長毛贈興
唔少網民大讚狼英look back好正，好有心思，但亦有人睇完只得苦笑，因為香港有個大話特首，就如片末最後一幕影住狼英做封面嘅時事雜誌《TIME》標題「Can Hong Kong Trust this Man」。
社民連噚日就趁狼英出席民政事務局新春酒會踩場示威，仲帶埋個裝有苦瓜嘅果籃贈興，諷刺朱門酒肉臭，路有凍死骨。會展保安一度阻撓，混亂間跌爛咗支裝有「血汗」顏料嘅酒樽。社民連主席梁國雄就好醒目，特登着番對皮鞋，兼潮着哲古華拉tee襯呔，令會展保安冇藉口話佢衣冠不整拒絕進場。
長毛入場後俾人贒到實，直至狼英同一眾官員上台祝酒就大喊：「梁振英下台，我要全民退保，不要大話特首！」不過音樂聲冚過晒長毛抗議聲，保安就趁機「請」佢離場。
李八方
mailto:[email protected]
