噚日拜讀曾淵滄博士題為「大鱷準備食大茶飯」專欄，講到有幾個國際大鱷，將大陸嘅地方債講到同2008年美國引發嘅金融海嘯一樣咁大鑊。曾博士話除地方債外，大陸啲銀行亦賣過好多理財產品。銀行雖已話到明唔幫呢啲產品包底，一旦有乜冬瓜豆腐，就會有人圍銀行叫還錢、還錢，但曾博士總結話：「地方債牽涉的問題多多，內銀股自然表現欠佳，不過，我依然相信，銀行是萬業之母，中央政府是絕對不會讓已上市的銀行出事的。」
阿爺將陰乾內銀
今日引述曾博士，就係因為喺咁嘅情況下，就要估政策同邊隻股受惠。而家不爭事實就係最大內銀已大到不能不救，達到冇能力救，故中央第一任務就係做細呢啲銀行。但又唔可以郁佢哋，因為萬業之母牽一髮動全身，所以估計國策將會係要陰乾佢哋。仲要因國內大銀行多年來借貸出去時，都有嚴重貪污情況，令資金嚴重錯配，故陰乾就一定係國策。所以話內銀唔「出事」，應該解讀成唔會畀佢哋執笠，至於有冇運行就肯定冇，做股東會好痛苦。
中央想陰乾啲大銀行好耐，一如我上周話過，呢啲銀行嘅規模一但爆煲，好似1997年印尼咁，能成中共倒台源頭。但之前一去陰乾，班內銀就走去搞啲睇落唔使上身嘅影子銀行理財產品。當叫停內銀賣理財產品，但中央又接受呢啲理財產品有存在價值，就叫資產負債表最健全嘅科技公司幫手，仲要一石二鳥，因呢啲例如阿里巴巴同騰訊（700）亦係最熟民企堅流嘅情況，所以如要斷所有級別政府借錢水源又畀健康民企借到錢，就靠啲科技公司。
當然有另一批在港上市企業亦都會受惠於「陰乾內銀政策」概念。係乜？就係返去改革開放初，國家痛定思痛好謙卑咁搵我哋啲身經百戰嘅港商幫手。今轉就幫手銀行最核心嘅功能，即資金分配。其實有一隻股份我睇咗好耐，講值博率最能受惠於「陰乾內銀政策」，下星期同大家分享。
孫柏文
獨立股評人
http://facebook.com/shuen
本欄逢周二刊出