立法會未來一個多星期，會再次爆發「數票風雲」。政府昨通知立法會將於下周三（19日）恢復二讀，審理長達一年嘅買家印花稅（BSD）條例草案。民主黨涂謹申提出修訂，要求日後加辣減辣要先經立法會批准，修訂獲通過機會很大。政府深知形勢不妙，拉票工作已由運輸及房屋局嘅層次提升至特首辦。
邱騰華出動「箍票」
涂謹申今次嘅修訂不能等閒視之，官場昨刮起「唔夠票」淡風。事緣BSD觸動商界利益，代表商界、向來同梁振英「過唔去」嘅自由黨、經民聯石禮謙已表明支持涂謹申嘅修訂，故只要商界和泛民傾巢而出，政府「實死冇生」，涂嘅修訂一旦通過，政府日後調整額外印花稅（SSD）同BSD，都要先獲立法會過半數贊成，唔可以再如以往般「先加稅，後交由立法會審議」。
有建制派議員透露，政府深知形勢不妙，上周涂謹申召開記者會公佈其修訂後，特首辦主任邱騰華已陸續打電話畀建制派議員「箍票」，要求保皇黨歸位，否決涂謹申嘅修訂，理據來來去去都係「更改稅率先交由立法會審議，未能適時回應市場」云云。另一方面，運房局噚晚亦相約部份議員，再次「疲勞轟炸」。
但政界既現實又殘酷，保皇黨是否支持一個由民主派議員提出嘅修訂，係政治決定多於理性分析。凡事say yes嘅經民聯，難道會承擔「讓涂謹申攞彩」嘅罪名嗎？但泛民嘅票也非穩固，泛民召集人馮檢基昨便透露，泛民對涂謹申嘅修訂未有共識，是否聯手支持仍屬言之尚早，泛民本周五會開會決定。