有人話，「推普機」是消滅廣東話的大敵，其實廣東話仇家眾多，點止普通話一個？
香港家長係頭號廣東話敵人。家長係廣東人，但寧願同仔女用英文溝通。
請菲傭教菲式英文，喺會所小巴廁所全天候講英文，中文同廣東話，變成次一等。
香港人心照，吳彥祖中文幾時有純正過，英文叻就得啦，廣東話列入家庭非法定語言。
教育層面更加唔使講，如果香港人真係咁愛廣東話，點解政府推母語教學，學校鬼殺咁嘈，好似世界末日咁？
又話廣東話係古漢語活化石？又話讀唐詩最合音韻，點解家長唔支持用廣東話教學？
好簡單，押韻不如搵銀。學校sell英語教學，家長自動排隊；你話我哋用最接近古漢語發音嘅廣東話授課……即刻整句袁崇煥「頂硬上」之前嗰句你嘆。
功利驅使父母轉投競爭力更強的英語懷抱，喺呢個選擇過程，家長考慮嘅從來唔係咩語言學嘅優劣，只係好單純考慮市場價值。
因此，今日家長追捧教普通話嘅學校，同政治投共完全扯唔上關係，亦無人得閒深究邊種語言係胡語邊種先係中原正音，同英文一樣，邊種語言有市場價值就係答案。
第二個敵人，大家有份。社會規則，廣東話不能入文（上堂作文寫口語重作pls），但其實廣東口語才是廣東話的賣點，你以書面語行文，誰知你是廣東人？
但偏偏，廣東口語不受重視。今之中文流行曲，十首有十一首都是書面語填寫，許冠傑那些「出咗半斤力想話攞番足八両，吹脹」的口語歌詞，唔係無，少好多囉。
黃偉文曾發起新廣東話運動，以口語填詞，卻慘遭滑鐵盧，那一刻無人會說甚麼「廣東口語其來有典古文皆見」。廣東話敵人何其多！