中國安芯（1149）食住祖國城鎮化及民生安全兩大重要課題，有超強增長動力，但股價就插到落一年低位，超賣之餘，預測PE得4倍，平霸同行，抵買。
安芯主打「ISD」及「ISS」兩瓣公共安全智能解決方案。由工業、危險品，到民生城市交通安全監察、家居保安，都包羅晒。安監系統兼有資料篩選，及危機處理提供，講技術，又係掃晒。
專業評估，祖國將會有高達600至800個智慧城市，成個產業鏈規模，將高達2萬億銀人仔。喺咁有利條件下，安芯已經肥仔水。再講，安芯手頭淨現金挨近20億銀，銀彈多亦有利集團通過併購，去開財路。
主要股東密密增持
安芯亦啱啱公佈，新購兆誼科技，進一步將擴大公共安全安保範疇，項目明年度保證溢利8,000萬銀人仔。安芯明年度業績，更加坐定粒六，但股價就逆大趨勢，插足半年，家陣喺一年低位，往績PE得番9倍，殘得冇理。
只係好保守計數，安芯今、明年度，只係keep住上年上半年純利四成增長幅度，明年EPS0.39元，預測PE得番4倍幾。場內搞民生安全，得安芯一家，祖國行家，高德紅外、安居寶及中瑞思創，全部預測PE 25倍樓上，安芯PE，大折讓八成！
又安芯主要股東陳洪，啱啱上星期五增持集團509萬股。陳生再對上一次，喺上年11月22日增持1,122萬股，以當日收市價2.22元參考，花費2,490萬銀，真金白銀投安芯前景信心一票，安芯現價1.79元，亦潛水近兩成。
買安芯，翻一番上到3.6元，明年度PE仍然講緊得9倍單位數，未有耐追到祖國行家。
錢雋
細價股專家
本欄逢周二、五刊出