最近呢，快必譚得志有份參與嗰個「佔中後援會」好出位，早前民主黨決志佔中，佢哋全程聲討，聲勢仲威過愛港力。有泛民中人就講笑話，呢個咁嘅佔中後援會，搞搞震冇幫襯，實際上應該叫係「佔中後庭會」先啱。不過呢，八方聽聞佔中發起人戴耀廷，最近真係有心打正旗號，搞番一個「愛與和平佔領中環後援會」㗎。呢個正版佔中後援會，會強調「愛與和平」四個字，主要由佔中義工組成，幫手落吓區擺街站、做吓宣傳等支援工作。
其實呢，佔中成員家陣都有擺街站，派傳單、收集吓市民簽名咁。戴耀廷喺今個新年，整理緊民間不同版本嘅政改方案，聽講佢𠵱家發現由泛民到建制派，最少出現咗16個不同版本嘅特首選舉方案，佢諗緊點樣用精簡文字同圖像，向市民一一介紹。