人稱「C.F」嘅中銀人壽執行總裁蔡中虎，可算係本地銀保（bancassurance）發展教父，佢舊年底再度退下火線，喺中銀人壽榮休，由其副手老建榮接任。不過以C.F喺保險界超過30年豐富經驗，中銀又點捨得畀佢走？所以呢頭退休，中銀香港（持有中銀人壽51%）已即刻延攬佢做該行保險業務顧問，繼續發揮佢嘅專業。
蔡中虎現年65歲，噚日同華華食飯，佢話趁住中銀人壽展開第二個五年計劃（2013至2017年），覺得係時候交棒。
其實早喺2007年底，C.F喺獅子行服務咗25年後，已正式榮休（時為滙豐保險亞太行政總裁）。不過2008年底，中銀人壽請佢出山，短短數載已成績彪炳，又大力推動人民幣保單，任內泡製「因為愛．張文樂篇」廣告，更成為行內經典。