本欄舊年12月曾推介中國疏浚環保（871，易名前為翔宇疏浚），當時報2.63元，其後最高升至3.18元，累積升幅21%，短線目標已達，如今由高位回落，值得再度關注。
短時間玩翻兜，當然有其可取之處，綜合有三點︰第一，食正國策！中國疏浚主要從事基建及填海疏浚、環保疏浚及水務管理業務等，易名後加入環保二字，擺明要向搶攻呢塊大肥肉，公司亦已表明心迹，未來環保業務比例，將由一成增至五成。內地霧霾天氣無日無之，3月初舉行嘅全國兩會，肯定會聚焦環保問題，中國疏浚作為概念股，落鑊喪炒只係時間問題。
第二，估值吸引！中國疏浚現價市盈率9.3倍，彭博綜合券商預測，今年市盈率更會降至8倍，用「蔗渣價錢、燒鵝味道」形容絕不為過，業務相近嘅水務股如光大國際（257）、北控水務（371）等，全部挨近40倍，縱然中國疏浚規模有所不及，但折讓八成肯定唔合理。
第三，圖表吸引！中國疏浚上月中由高位回落，但依然守穩起自去年11月嘅上升軌，夠硬淨！日線圖近日已行至三角形末端，隨時爆邊，只待催化劑出現，買定有着數。用預測市盈率10倍做目標，可見3.6元，潛在升幅25%！
唐牛