中海外（688）前主席孔慶平舊年8月退任上市公司，專心打理母公司中海集團，雖然職位唔同咗，但噚日中海外舉行傳媒春茗，孔總如往年一樣，帶埋中海外一班高層露面。
被問到退任半年做乜，孔總竟然笑住扭動幾下膊頭，話「學緊卸膊呀！」新年流流講呢啲？原來孔總嘅意思係，已經將上市公司嘅業務全部交畀接班人，大家有乜問題，就問中海外主席郝建民。
孔總𠵱家係中海集團副董事長，當大家問佢攞新卡片，佢話身上只得利是，冇卡片，叫大家將佢舊卡片上嘅主席衍頭刪走咪得囉。至於將來再升職係咪做官？佢擺擺手話「𠵱家做官好難㗎」。
雖然已調職，孔總仍然在港返工，上星期佢就返北京老家過節休息，貪人少夠靜，費事出外旅行同人逼。佢話春節北京冇塞車，半個鐘去邊度都得。下月佢又返北京出席兩會，到時恐怕冇咁爽。