今季NBA嘅傷兵消息幾乎日日有咁滯，木狼「雙奇雲」前鋒路夫（Kevin Love）同射手奇雲馬田（Kevin Martin、下圖）喺上周六場常規賽齊齊因傷缺陣，結果喺主場以110:117輸畀拓荒者，錄得3連敗。輸吓輸吓木狼已經跌到去西岸第11位，要爭季後賽席位真係唔多樂觀。
兩大奇雲都係木狼嘅進攻主力，但路夫喺贏湖人嗰場波撞傷臀部，雖然已經喺上周五復出鬥塘鵝，但到今仗又要唞；不過路夫話佢一定可以趕得切出席周日明星賽。至於馬田就慘啲，佢喺輸畀塘鵝場波裏面整傷拇指，證實指骨骨折，要無限期休戰，未知幾時可以復出，加埋一直養緊傷嘅中鋒比高域，陣容認真殘缺。
入季後賽有難度
講番上周六場波，拓荒者有6位球員得分達雙位數，包括入全隊最高26分嘅阿域治。木狼雖然有控衞盧比奧攞25分同9次助攻，但最後都難逃一敗。木狼教練艾杜文賽話話：「即使有主力缺陣，頂上嘅球員都應該要有好表現。我哋唔應該在意邊個唔打得，而係點樣可以令到候命嘅球員發揮最大威力。」木狼連輸3場後戰績改寫為24勝27負，得勝率跌至47%，同西岸第8位嘅小馬已經有成6場場差，形勢險峻。
