這個農曆年，小弟按「傳統」與友人團拜加指定動作「聚賭」，但不同的是興起了「新」玩意──「打天九」。初學天九，最難是分清「文子、武子」及辨認各牌大小。拜改變人類生活的蘋果教父喬布斯所賜，讓我們可將各牌順序排好的照片發送至各人手機，大家照住打；配合幾個遊戲apps熟習規則，十數個「後生仔女」（至少心境仍後生）一個下午便全學懂，且樂趣無窮！
已故掌故專家吳昊老師說：「我在打天九，其實是在『撫摸』中國文化！」例如文子最大4隻「天、地、人、和（或鵝）」，便來自中國文化着重天地人合一的精神。最有趣，還包含了很多講波佬術語，講解玩法時講到「咁就叫『單天保至尊』喇！咁就係『輸到一戙都冇』。」在場無論男女都「哦！」點解講波佬鍾意將天九術語用於講波？唔通講波佬都爛賭？
其實大家現今熟悉的麻雀館，牌照在牌照事務處正名為「麻將/天九牌照」，可見當年天九與麻將在民間同樣盛行。普羅球迷以男性佔大多數，天九又較受男性歡迎，講波佬引用當中術語，該是為迎合大眾口味。而「叫糊、食詐糊」及「腳腳七注」等，亦來自麻將及十三張等。至於現代講波佬，爛唔爛賭就唔知；但數年前「足球評述員協會麻雀王大賽」，大哥瑜以壓倒性姿態勝出，就肯定係一代雀王！
方柏翹
now足球評述員