渣打馬拉松將在周日舉行，雖然近年屢遭批評安排不善，但始終係本土味最濃嘅集體運動，每年報名人數有增無減。咁渣馬服裝贊助商特步（1368），又有冇炒作機會呢？翻查紀錄，特步由2012年起開始贊助渣馬，當年比賽前一周，特步累升11%，舊年則相對失色，一周累跌6%，值得留意嘅係，特步走勢同大市一致，如果戰友認為恒指本周繼續彈，不妨小注買入特步。集團存貨周轉日數縮短至5個月，折扣率亦減至20%，雙十一網上銷售更錄得逾千萬銷售額，成為集團新亮點，見底回升味濃。現價市盈率8倍，息率逾6厘，可以一博。
大市散完又彈過，絕對唔易玩，股份要有炒作概念兼高防守力，先可以逆流而上，主打電子商貿及保安方案嘅貿易通（536），可以一次過滿足晒兩個願望。
講概念，近期網上支付股喪炒，貿易通立即升呢；財爺早前透露，金管局計劃明年下半年推出電子支票，作為該局認可推行電子支票認證供應商，貿易通再一次中獎，本月26日財政預算案公佈日，話唔定有好消息出台，買定有着數。講防守力，現價年度化市盈率22倍，息率近五厘，配合亮麗前景，估值絕對唔貴。上周五破旗而上，正好為新一輪升浪熱身，有買趁手。
唐牛