耀才證券（1428）老闆葉茂林分拆公司上市成癮。佢上個月先至將做夜場生意嘅Magnum（2080）分拆上市，噚日又自爆計劃今年將耀才財經台分拆喺創業板上市，預算集資1億元以下，事在必行咁款。
耀才2010年8月上市，財經台接近同步開台，過往一直都係耀才嘅宣傳工具，主要喺交易時段透過網站同手機App直播財經節目，佢哋唔少分行亦擺部大電視直播節目。
財經台除咗有「生招牌」郭思治（郭sir）坐鎮，最大賣點係有三位靚女主播，每日輪流做節目兼接聽電話。三位女主播分別係做咗四年嘅鍾蔚茵（Jennet）同劉幸鈺（Nicole），同埋做咗一年半嘅謝美琪（Mag）。
Jennet喺加拿大讀書，大學修讀經濟學，除咗做主播，仲做緊郭sir嘅助理。而Nicole同Mag就做過電視台主持，經驗豐富。
受王維基啟發
雖然耀才財經台有向其他企業提供廣告平台，但據講一直都係播放耀才嘅廣告。
葉茂林噚日透露，呢個分拆大計係受到香港電視（1137）主席王維基透過收購中移動（941）子公司而獲得流動電視牌照所啟發，佢覺得網絡資訊可以世界通行，市場潛力巨大，為咗要行快人一步，未來將會增聘主播，大力發展財經台。
除咗主力嘅財經節目外，佢仲會考慮加入娛樂性節目㖭。唔通佢打算聯乘Magnum推出新節目？
李華華
mailto:[email protected]
