美女菲菲share一篇趣聞，題為《情人節「急救」》，教大家10分鐘搞掂份情人節禮物，當中有999朵紙玫瑰、手畫卡以至自家朱古力，全都是網購番嚟，回想中學雞時代，上堂喺枱底摺星星紙、織頸巾呢啲情節而家已經唔再啱用，網上實在太多選擇同太抵，與網購有關的物流股中國外運（598）上周率先炒起，其實仲有隻網購概念股，就係賣錶的時計寶（2033）。
唔少零售股都有將產品擺喺網上平台賣，為何偏偏揀呢隻？因時計寶戰績彪炳，旗下「天王錶」光棍節錄得逾1,330萬元（人民幣．下同）的銷售，居手錶種類的首位，主席董觀明透露，網購業務每年增長可達40%至50%，更指自去年4月設立電子商貿平台後，網購已做了1億元生意，平均售價約500元，作為內地品牌手錶商龍頭的時計寶，其品牌效應在各網購平台插旗後，更能取得優勢。
時計寶亦吼準情人節商機，在網上平台推出不同款式情侶手錶吸客。去年在習總肅貪倡廉下，零售業一沉百踩，不過主力做幾千蚊貨仔的他們，首份全年業績顯示動力仍在，營業額增長25%，毛利率也有所改善，純利亦增16%達2.13億港元，雖然光棍節報喜，但該股10月以來仍然在橫行通道上整固，上周五抽升半成，MACD快現雙牛，不妨而家上車，迎接「甜蜜經濟」的商機。
Samantha
本欄逢周一、三、五刊出