上星期四本欄講「支持港台」，有老友來電質問：「做乜咁擦鞋，你唔係反對政府企業嘅咩？」當然，左丁山係市場派，素來以為政府企業機構缺乏效率，不足為法。但經營電台，如果係莊敬自強，報導新聞不為政府喉舌，不做「沒有真理的報紙」（蘇聯時代嘅蘇共刊物真理報），不為黨中央宣傳部緊密控制嘅央視央台，而係英國BBC模式，就好值得支持。
左丁山曾在港台做過節目主持，略知港台節目之製作嚴謹，有規有矩，不受政府新聞處控制或影響，編採十分獨立，值得尊重。公務員制度有一個好處，就係人員好難無故被上司炒魷，故此處事夠獨立。一個唔好處就係死板（審計署尤其令港台死板加死板），故此一啲港台前員工離開港台後，到其他電台工作就幾難適應，真係退休好過。難炒魷，並非一定會編採獨立嘅，各國政府可用不同手段、方法對付唔聽點嘅公營電台，例如日本NHK，澳洲ABC就會俾政府「整理」啦，最近安倍晉三咪安插三名自己友入NHK董事局，導致NHK會長松本正之宣佈不尋求連任，就係一個好例子。
港台之編採獨立傳統源於麥理浩時代，港英新聞處放寬對港台新聞嘅干預，張敏儀做廣播處長後，極力頂住不同干擾，為港台編輯自主奠下根基，形成傳統，九七後嘅新老闆梗係唔高興啦，咪逐漸陰乾港台囉。如果唔係，港台在將軍澳興建新大樓，駛乜搞成十年起碼呀。
對付港台，梁振英唔會比安倍晉三對付NHK更手軟，必定採取摻沙子方式，逐步攤薄港台內部團隊，他日即使肯撥款支持興建，購買新設備，都唔代表甚麼，中央電視台嘅建築幾宏偉呀，硬件一流㖭。
如林行止先生考證，馬克思年青時最講新聞自由，反抗當權者，但當共產主義革命成功之後，世界上嘅共產主義政權鎮壓新聞自由之狠辣，歷史罕見，正如毛澤東被蔣介石圍剿時猛講民主選舉一樣，佢一旦站上天安門，民主派就俾牛頭馬面拉入地獄了。在資本主義社會，新聞自由是傳媒老闆的資產，梅鐸享有最大的新聞自由，之不過互聯網帶來真正百花齊放，百家爭鳴嘅言論自由，令資本家逐漸管制不了。共產社會？就一於拚命禁制啦。