馬年新春前夕，梁振英、英國駐港總領事吳若蘭、美國駐港總領事夏千福三人都分別製作咗條新春短片向香港人拜年。今日正月十一，新春過咗十日，八方噚日就幫呢三條短片埋單計數，睇吓各自嘅點擊率。結果，狼英唔係輸，而係慘敗畀兩位總領事。
喺電視機日播夜播嘅狼英賀年短片，政府新聞處同時上載咗上YouTube，點擊率係4,410，其實比起佢嘅689票，算叫做唔錯㗎，多咗五倍喎，有交代啦。呢個咁叻叻嘅點擊率，700萬人嘅香港，每1,600人就有1個睇過。睇完條片，讚好有5個，dislike就有103個。
吳若蘭獲1,133個like
英國隊嘅若蘭BB，全程用「唔鹹唔淡」嘅廣東話拜年真係俘虜唔少網民，短片嘅點擊率達26,720。八方噚日重溫，先發現片中唔止有吳若蘭，仲有財經事務及庫務局前政治助理伍潔鏇，原來若蘭BB去咗八珍辦年貨，由新加坡出生嘅「坡妹」伍潔鏇負責招待。呢條片呃like數目達1,133，唔鍾意嘅就有11個。
遇強越強，今年發表首條處男短片嘅新任美國駐港總領事夏千福，佢條「鍾意處理港人重要議題」嘅短片，一共吸引87,650次點擊，即係平均約80位港人，就有1個睇過，呃like達2,488個，唔like就有48個。不過又咁，套用狼英嘅邏輯，唔click唔代表冇睇過，冇睇過唔代表唔支持，唔like唔代表唔鍾意，right？
mailto:[email protected]
賀年短片 點擊率大比拼
【4,410】■狼英出動埋老婆一齊拜年，都只係呃到5個like咁大把。
【26,720】■若蘭BB去八珍辦年貨，由財經事務及庫務局前政治助理伍潔鏇招待。
【87,650】■為食嘅千福baby餵馬仔食蘿蔔糕咁趣致，網民梗係buy啦。
資料來源：YouTube
註：點擊率截至昨晚8時
