林建名年少風流成性，佢囝囝林孝信都有佢嘅playboy個性，日前被發現同鄭少秋個女鄭詠恩（Winnie）撻着，態度親暱撐枱腳，Winnie上月初先同鬼仔男友Josh見家長，𠵱家火速同林孝信約會，有一腳搭兩船之嫌。馮仁昭噚日搵到身處美國嘅林建名，佢話唔知囝囝拍拖：「鄭少秋個女，同𠵱家個老婆生嗰個，靚唔靚？我未見過，行吓街冇乜問題，有攬吓冇乜特別，𠵱家女仔都係攬。」
「連姊妹都唔理」
問林建名有冇畀意見囝囝識女仔？佢話：「佢又冇問我，佢諗住叻過我，我會教佢對女仔有禮貌，佢自己醒目。」會否怕女仔睇中囝囝家底厚？林建名話：「我冇畀錢佢使，使落女仔同自己都唔好太闊佬，佢平時要買嘢先會畀錢佢，真係做嘢自己搵錢使。」講到對囝囝嘅女友要求，佢話唔介意女方家底唔及林家豐厚：「就算嫁入豪門想做少奶奶都冇問題，唔好大野心，連姊妹都唔理，冇晒親情，要心地好，最緊要人品。」大少強調唔介意Winnie男友如風車轉：「佢可能未揀定，我個仔都可能係咁，帶返嚟啲女仔見吓就唔見，唔認得，佢都係拍拖玩吓未定性。」至於秋官至截稿前未有回覆。
撰文：馮仁昭
