湖人喺上周三作客騎士場波打到得番4個人勉強慘勝，球隊喺上周五轉戰費城，有老將尼殊（上圖右）復出領軍，陣容稍為好轉下以112:98贏波兩連勝。呢場波咁啱亦係尼殊40歲生日嘅日子，唔知係咪因為咁表現都醒神啲，個人貢獻咗19分。
卡文瞓櫈相被網民惡搞
湖人不斷受到傷兵問題打擊，喺上周五呢場波總算有9個球員可以候命。尼殊小休一場之後喺今仗復任正選，攻入19分兼有5次助攻同4個籃板球；原來歷來喺NBA只有3位球員可以咁啱喺40歲牛一嗰日正選上陣，之前兩位分別係渣巴同史托頓。尼殊𠵱家係現役NBA球員中最年長嘅一位，佢喺賽後話：「我依然深信自己喺球場上仲會有貢獻，要繼續打拼，就要腳踏實地咁為每一日做好最佳準備。」
湖人將士用命，其他球員都有唔錯嘅表現，其餘8位上陣球員裏面有5個得分都達雙位數，包括「瞓直之人」卡文貢獻咗17分。講開又講，卡文喺上周三湖人打到冇晒後備贏騎士場波，索性喺冇人坐嘅後備席上打橫瞓喺度，呢張相隨即成為咗網民惡搞對象（小圖）。網民將卡文放喺最後晚餐張枱上面，又帶佢去索契冬運選手村嘅經典雙馬桶度，都係得啖笑啫，我估佢都唔會介意嘅。