2013季度的超級碗決賽，由NFC的西雅圖擊敗AFC的丹佛，對股市是好是壞？根據過往紀錄，每年NFC隊伍贏波，股票會好，AFC贏波，股市會唔掂，在美國稱之為Super Bowl Indicator。過去47屆超級碗賽事，NFC贏了25年，每年的投資平均回報率高達11%，正回報率的機會高達88%；AFC贏了22年，每年投資平均回報率只有3%，正回報率的機會只有64%。一些股票分析師認為將超級碗冠軍與股市聯繫起來，純屬無稽之談，但數字就是這樣，冇得拗頸，但在統計學上，兩者雖然有相關（Correlation），但並非有因果關係。
不過，二月二日賽事後，美股在二月三日開市就跌到四腳朝天。杜瓊斯工業指數下滑324點，弊傢伙啦，難道今年超級碗指標唔靈，股市不升反跌？如果唔靈嘅話，就係我地老祖宗嘅立春八字指標靈咯喎（火多剋金，見二月五日本欄，當日錯寫陰金（辛）為陰水，謹此致歉）。
昨日話超級碗球賽一面倒，唔好睇，但曼城主場不敗之身俾車路士打破，場波就十分好睇。摩連奴排出鋼鐵防守陣容，中場爭奪佔上風，曼城前鋒得唔到供應，射門機會少，敗得無話可說。曼城之敗，有兩個藉口，其一係神射手阿古路因傷缺陣，在車仔禁區內，冇阿古路執雞，總係差啲。其次不少人忽略咗，曼城嘅耶耶托尼過往咁神勇，皆因有一位防守中場，巴西好手Fernandinho永遠在耶耶後面掃蕩搶波，今將佢因傷出唔到場，代替佢嘅阿根廷中堅迪米捷斯速度慢，傳球冇尺寸，累得耶耶頻頻回防搶波，不能好似以前咁全力助攻，連帶之下，大衞施華亦因此踢到下半場末段已經冇晒力，阿古路唔出場，最多冇入球，但費南甸奴缺陣，就導至失波，成為勝負關鍵。不過賽前車路士亦好嘢，及時在一月轉會期間，賣走馬達（主攻），買入馬迪（主守），呢位25歲塞爾維亞球員馬迪，身高6呎4吋，步大力雄，與耶耶鬥頂鬥撞鬥搶，一啲都唔輸蝕，令耶耶冇啖好食，係今季以來嘅罕見現象，摩連奴用人真有一手，佢贏波兼贏埋牙骹，氣得對手牙癢癢，冇佢符。曼聯董事局有眼無珠，球季前唔搵佢而搵莫耶斯代替費格遜做領隊，抵曼聯今季四大皆空啦。