內地女星「長舌」一直好唔鍾意「小花」，唔鍾意佢並唔係因為感情事，而係因為小花為人令佢好討厭，其實長舌一向嘅工作態度都好好，唔少同佢合作過嘅演員同幕後人員都對佢有讚冇彈，但有次佢同小花合作拍部鬼佬片，電影公司一人請一個司機畀佢哋，原本相安無事，但小花經理人有日突然同電影公司講，要炒咗長舌個司機，話佢太嘈，咁電影公司都O晒嘴，冇諗到佢哋要炒其他演員嘅司機，咁當然冇睬佢。
撩人傾偈冇人睬
不過，呢件事就俾長舌同另一位女星「小K」知道咗，兩位女星都不值小花嘅野蠻行為，所以兩位女星就聯手對付小花，喺現場除咗埋位，真係一句偈都唔同佢傾，搞到小花喺現場好冇癮，雖然佢有主動走埋嚟同兩位阿姐傾偈，但人哋就唔同佢講嘢，等佢尷尬 ，呢啲咪佢自己攞嚟衰囉。
撰文：關仁