尼曼查維迪俾曼聯當係草，但就畀國際米蘭當係寶。呢位32歲塞爾維亞中堅禮拜四宣佈喺今夏約滿唔再做紅魔，聽聞係曼聯唔肯畀新合約佢，佢先至有咁嘅決定。但佢唔愁冇出路，事關據報國際米蘭力邀佢加入，仲願意同佢簽兩年約㖭。
投國米人工減半
家陣係曼聯隊長嘅維迪，係費格遜喺06年1月由莫斯科斯巴達用700萬鎊買返嚟，仲係費爵爺領隊生涯其中一個最有眼光嘅收購。英國傳媒話係佢拒絕同曼聯傾續約，但另一個版本就話係曼聯嫌佢老同呢幾年成日受傷而唔畀新合約，佢先至決定喺今夏以自由身走人。維迪喺聲明中表示：「今年係我喺曼聯嘅最後一年，頭頭尾尾喺度踢咗8年。可以效力一間咁偉大嘅球會，肯定係我踢波生涯最光輝嘅日子。我從來冇諗過可以贏到15個錦標，而且唔會忘記嗰晚喺莫斯科發生嘅一切（08年歐聯決賽贏車路士）。但係，我決定喺今季完結後離隊。我想接受新挑戰，希望喺未來幾年喺足球事業上有另一個高峯。」莫耶斯證實維迪將會走，但佢喺下周日對富咸場英超都會踢。
維迪仲話一定唔會留喺英超：「我唔會考慮留喺英格蘭，因為喺呢度，我只係想效力曼聯一間球會。」維迪斷咗自己後路，即係話會去西甲、德甲、意甲或法甲搵食，消息指國米最有機會簽到佢。雖然國米開畀佢嘅周薪只得5萬鎊，比佢家陣喺曼聯𢭃嘅10萬鎊少一半，不過一畀就畀到兩年合約，所以據報佢都肯降格到聖西路踢波。
傑斯加利仔合作搞青訓
另外，曼聯中場傑斯同埋名宿加利尼維利想買非聯賽球會沙福特，之後再投資搞青訓。家陣喺美國邁阿密搞波嘅碧咸，佢隊波如無意外會喺2017年開始玩美職聯，睇嚟佢好有可能同傑斯及加利仔連線，搵佢哋幫手彈啲有潛質嘅年輕球員畀佢。