【上環、銅鑼灣】圈中真係唔少恩愛夫妻，啱啱喺舊年11月底幫Neway二少薛嘉麟生咗囝囝Arthur嘅諸葛紫岐（Marie），前晚同老公暫時放低囝囝，兩公婆恩愛喺上環尚興打冷，大約8點幾，Marie同老公撐完枱腳準備離開，可能已經知道門口有記者，戴住黑超、已經收晒身嘅Marie同薛二少十指緊扣行出嚟。
前日人日仲係新正頭，Marie同老公心情都特別好，同記者打招呼又派利是，薛二少收起平時嘅cool樣，笑晒同記者講新年快樂，不過問到囝囝𢭃得多唔多利是？Marie只係笑冇答，派完利是就上車走。
Bobby拍拖買蛋糕
另一邊廂，歐陽震華（Bobby）同老婆傅潔嫻老夫老妻同樣恩愛，前日下晝4點半，兩公婆拍拖喺銅鑼灣利園嘅Cova餐廳買蛋糕，買完就揸車離開，原來佢哋夜晚去會合經理人Lydia同宣萱、陳秀雯及呂晶晶等人團拜。
採訪、攝影：畢紹基、李志明、梁繼光
